【新增影片】郭可盈後日47歲牛一，正日會同老公林文龍同囡囡林天若（津津）慶祝，郭家近日喜事重重，可盈胞弟郭可頌上個月同熊黛林（Lynn）結婚（新聞連結： http://bit.ly/2fnkTlH ），姑奶生日，弟婦Lynn當然要出席生日飯局，早前家人為可盈預祝生日，當晚飯局仲有可盈媽咪同囡囡津津，三代同堂。

可盈今日接受《蘋果》電話訪問時話：「年年都係同家人生日食餐飯，當日好開心，只係爭文龍冇嚟，佢返咗內地開工，舊年齊人啲。」可盈今年生日，Lynn正式加入郭家，仲以弟婦身份出席，佢同老公一齊送咗絲巾畀壽星女，可盈話：「佢哋送咗絲巾畀我，份禮物好溫暖，呢排天氣凍啱啱好。一個人開心，送唔送禮物都唔重要。」

可盈一直對Lynn讚不絕口，佢話：「我哋好一家人感覺，Lynn喺香港冇親人，我哋成家人相處愉快，好開心，佢媽咪好放心將佢交畀我哋。」係咪好想細佬同Lynn快啲生BB？可盈話：「生B呢啲嘢，佢哋識㗎啦，我唯一可以做係祈禱，等天快啲送佢哋BB，呢樣係個天決定。」
　
問到可盈嘅生日願望？佢話：「年年差唔多，全家人都有份，all the best，大家身體健康。」囡囡津津送咗乜嘢生日禮物畀媽咪？可盈話：「佢送咗紮花，有我鍾意嘅玫瑰，但配埋向日葵講真唔多襯，但係囡囡一番心意，我都好開心。」

6歲多嘅津津，完全係mini版可盈，可盈話：「o依家似番我少少，初初出世個個都話佢似文龍。囡囡手長腳長，又鍾意擺甫士，咁佢有少少天份，甫士係睇電視學。」原來津津會將手放嘴脣邊擺甫士，可盈仲爆話佢睇爹哋拍港視劇集《三面形醫》學識。

可盈同文龍得津津一個獨女，可盈話將來女大女世界，如果囡囡要步媽咪後塵選港姐，可盈話：「將來先算，個世界一路變緊，o依家只會灌輸佢正面思想，讀好書，畀佢健康心態。智識係財富，大學畢業o依家好普遍，佢讀好書先揀做乜嘢，佢想做乜都支持同鼓勵佢，喺囡囡身邊同佢分析利弊，好難阻攔，始終選擇權喺佢自己度。」