近年唔少區議員都撈埋旅行社嗰瓣，組織街坊旅行團，仲有好多人都會選擇親自帶隊。上個月帶街坊團去澳門旅行，但被拒入境兼要遣返嘅公民黨油尖旺區議員余德寶，噚日就膽粗粗再次帶團旅行，同三十幾人一齊去佛山、順德同番禺兩日一夜。余德寶話呀，上次去澳門都被拒入境，估計今次北上過關都會有阻滯，點知，過程出奇地順利，話咁易就成功北上，照咁睇嚟，澳門畀內地更加「殺無赦」。

余德寶笑指今次旅行嘅主題係「增肥之旅」，一眾團友可以喺兩日之內食足九餐，分別食勻早、午、晚、下午茶同宵夜，個個團友都「滿載而歸」。佢仲話今次團友反應好好，相信日後會搞多啲同類旅行團喎。