傳媒競爭激烈，務求攞到獨家猛料率先披露以彰顯實力，雖然消息未得以證實，但唔少可靠消息係來自當事人，甚至根本就係對方有心利用媒體放風，目的離不開測試市場水溫，例如近日有關滙控（005）搬總部傳聞，明顯就係有人用苦肉計博釜底抽薪。
傳媒需要資訊，市場中人需要揚聲器，搵第三者放氣球測試反應再行動，務求一擊即中。例如上月上海證交所同巴西商品期貨交易所將簽署兩地股票交叉上市協議、新地（016）同Capital&Countries商討英國地產項目合作嘅報道，又例如前排內地《每日經濟新聞》報道，傳聞股神畢菲特以10億美元入股招行H股（3968），即時令股價升逾2.5%，但故事冇下文故持久力不足。

溫總理09年初接受英國《金融時報》訪問，正值金融海嘯水深火熱一刻，中國GDP增長又於之前一個季度、即雷曼爆煲後下滑至6.8%，溫總借該報向全球派定心丸，表明有信心「保八」，專訪獲全球通訊社同媒體廣泛轉載。去年3月兩會後在人民大會堂會見中外記者時，第一個獲欽點提問者正係《金融時報》，講到明話人民幣冇被低估，當然又係想藉此向全世界發功。
缸湖險惡，大鱷小鱷明白傳聞幾時都係最佳藥引，前日午後路透社再成為中資股興風作浪嘅源頭，中間又係有位「消息人士」透露，幾家內地銀行嘅差別存款準金率獲鬆綁，令港股由飯氣攻心嘅悶局中醒過來衝高近400點，縱使暫時仍未有人出來澄清消息嘅虛實，卻足以反映消息人士何其明白市場的懸念所在，當然唔只來自延長交易時段，否則A股同時出現反覆悶局又賴邊個？
然而，影響力同公信力息息相關。市場盛傳《人民日報》旗下人民網將於6月在上海上市，作為國家重點新聞網站，要知道幾時才可以擁有外電一石激起千層浪嘅影響力，就要睇幾時全球主要媒體會將人民網嘅報道，即時轉載發放開始。

胡孟青
作者為獨立股評人