嘩!除夕DVD:寸嘉賓 加插後台料
好過現場睇 軟硬演唱會2006
正如林海峰一開始就講:「嚟睇得我演唱會,起碼三張幾嘢,唔少人都係聽軟硬天師聽大。」聽番兩人幽默搞笑對答,好似變番細路咁返老還童,今次演唱會DVD包裝精美,收錄多名嘉賓的表演,仲有軟硬寸人精句,DVD中又加插後台情況,睇晒演唱會內外面,好過睇現場!
記者:許福合
跳完舞到後台,飲吓水,唔少得梳個靚頭,軟硬唔係太多頭髮,唔使點梳。
軟硬回到後台,工作人員一擁而上,立即被剝光豬,再換上新戲服。
為懷念羅記,阿Jan單人唱嘅《流行曲》,裝扮夠晒姣,似足羅記咁款。
今次好多衫換,第一Part完咗,軟硬就回到後台,換番套禮服上台表演!
答謝環節,阿Jan不能不提家姐林姍姍,佢好識做,企起身畀大家見吓。
好多人話要去現場睇,先可以感受到好玩氣氛,嗱DVD都唔差㗎。
做完Show返到後台,唔少工作人員上前握手,不斷聽到「GoodShow!GoodShow!」
軟硬請來嘅嘉賓,除咗唱番首歌,自然唔少得被軟硬玩餐飽,暗寸明寸,以下就係佢哋嘅精句!
「黎明除咗係最靚仔唱片公司老闆,佢仲係唯一可以企定定唱快歌嘅歌手,真係高人。」
「Beyond係咪不和?人哋娶個日本老婆,婚禮上就唔見你,係咪反日先?」
「成個演唱會,只有一個人出場時,掌聲多過我哋,佢就係歌神張學友!」
「軟硬開演唱會?開表演會至真嘛!」
「陳奕迅開9場,我10場,多你一場!」
古巨基講到曾訪問過軟硬,仲被玩咗一大輪,阿葛話:「有咁嘅事,我唔記得嘅!」
楊千嬅一出出,又笑儍咗。「楊千嬅可能係現時最好打嘅女歌手!」
《longtimenoseesofthardhongkongcoliseum2006》
DVDBoxset包裝包你話靚,內容包括有3隻DVD以及精美相集,仲包括曾喺演唱會出現嘅波鞋公仔,不過好貴。