歌手楊千嬅老公丁子高做開公關，但唔係財經公關，好少幫上市公司或金融機構做嘢，噚日佢竟然喺港交所（388）中環展覽廳出現，參與新股上市儀式，講明準備撈過界，賺多啲奶粉錢咁話。

部署再打新股主意

丁子高今年初開咗間公關公司，佢話，公司一路都係接時裝表演、大型宴會呢類工作，好少財經客仔，噚日掛牌嘅創業板新股施伯樂策略（8260），其老闆咁啱係佢老友，對方搞上市時搵佢做公關。
打開咗個門路，丁子高索性撈過界，佢希望將來可以接多啲新股嘅公關工作，聽聞有娛樂公司想搞上市，佢已經積極部署向對方埋手。
講番呢間專幫金融機構請人嘅施伯樂策略，噚日股價最多升34%，收市升20.7%。
雖然丁子高喺上市儀式搶咗唔少風頭，仲有位男性執董變身小粉絲要求同佢合照，但係主席張天德應該唔介意兼好滿意啦！