史上最好笑的廣告，就是林司長和袁國強譚志源滿臉堆歡，政改「有商有量」，我們很想聽你的意見。
不用太艱深的政治理論去分析，只要用「港女mode」代入，一清二楚。
「港女mode」：「不如我地商量吓今晚邊度食飯啊，我好想聽吓你嘅意見。吓？食麥記？Sorry囉，我諗我唔係孻個肯同你捱嘅女朋友囉。食中餐？我唔要食地溝油囉。做乜黑我面呢？我依家咪同你商量緊食咩飯囉？但有啲方案真係違背咗我嘅底線嘛。唔好扁嘴啦，我真係好想聽你意見㗎，我心目中無特定方案。BB，我真係好開放想同你有商有量，你即管提意見啦……」
有商有量，就係你sayyes之餘，我都可以sayno，你可以堅持，我亦有權唔屈服，大家意見份量一樣咁重，先叫「有商有量」。侍應同個客落order，呢啲就唔叫「有商有量」，侍應無權同個客爭辯「不如你唔好食飯，你食意大利粉啦」。
侍應只能忠實記錄客人的點菜，充其量給予飲食意見，客人完全可以不理。
政改諮詢，香港人只是一個侍應，記錄並執行阿爺落的柯打，我們想推介一個「廚師精選」，《公民提名》菜式，馬上被人打回頭：「唔好太快有既定立場。」
說來好笑，政府明明話「我地好想聽你意見」，但當你講意見，佢又回應你「唔好太快有立場」……如果無立場，則如何講意見？
政府連自行判斷，「公民提名」有無違反《基本法》，都辦不到，只能推搪「不評論個別方案」，因為阿爺壟斷了解釋權。
這種不平等狀況，如何「有商有量」？
90幾歲肺癆肝炎兼腎虧的人講「有心有力」，毛澤東同你講「有商有量」，除了笑，還能有何反應？