今期「鬼盤情報」由我畢傑接手小試牛刀，唔用近期冇路捉嘅盤口分析，齋用往績去揀出鬼盤陷阱。根據近兩季歐冠盃分組賽第2輪賽果顯示，主場一方勝率零舍高，上季16場贏9場；前季就仲勁，主隊更贏足13場，似乎呢輪都要昅實啲主場出擊隊。
不過凡事有例外，好似里昂呢班波近期贏到唔識停，今晚作客喺首圈大炒基輔戴拿模四個一皮嘅布加勒斯特星隊，「讓球」要讓主隊半球收2倍高水；以莊家心態睇，擺明博你唔信會開上盤。
近兩季分組賽次輪雖大旺主隊，但里昂係特別例子，連續兩季最鍾意作客贏波贏盤；包括上季贏洛辛堡1:0，同埋贏布拉格斯巴達2:1都係作客出擊得手，呢鋪要硬里昂！

次輪旺主場出擊

話明今期係「資料鬼盤」，點都信番多少數據捧吓主隊，好似周三嗰兩場國際米蘭同華倫西亞，要昅實佢哋可以砌低作客嘅拜仁同羅馬，兩隊都係讓半球，要埋上盤。國米呢期好飄忽，領先對手3、4球都可以俾人追番幾粒，今次讓拜仁半球肯定大把人吼下盤；之但係國米有連續4季分組賽次輪贏晒嘅數據支持，反吼佢哋擊敗今季作客實有波失嘅拜仁好過。
至於羅馬近期贏波率唔低，但多數只係對弱旅帕爾馬同錫耶納，以華倫攻力，唔好俾「半球」嚇親，上盤先係正路。
文：畢傑