6月2，係香港父母的大日子，事關呢個六四前夕，正正係小一統一派彩（位）之日，中籌者自然笑逐顏開，落選者只有疲於奔命。慶幸一年前「下定決心唔玩呢個遊戲」，甚麼第一輪自行分配學位填表要睇攻略，酙茶灌水鋪路搞關係大小動作，一樣都冇做。

當人人擔心入邊間一條龍學校，定係瞓身報名乜基物基，派唔到第一二三志願，去邊度叩門先至可以快一步……兩日前，我個仔開始放暑假，兩個半月，8月中開學，就自然自動成為小學雞，之後一直讀到上高中（12班）……係呀，我走咗去美國。

仲要誤打誤撞，去咗「全美第一校區」，#1 Best School Districts in America，出自 www.niche.com。講到排位，當然有好多種講法，好多個版本，NICHE 只係其中之一。其實排第幾，真係唔重要，重中之重係唔使煩，只要有個地址，夠歲數，就有書讀。我個仔係插班生，所屬地區全日制幼兒班上學期冇位，好，過去隔離區半日制幼兒班讀住先，有人退學就由你補上。果然，真係有人唔讀，真係唔該晒！你要知道，半日制只係返兩個鐘頭九個字學，天寒地凍晨早送完個仔返學，返屋坐又唔係瞓又唔係，又要趕返去接放學；全日制相對合理好多，六個半鐘，起碼可以返屋企剷埋雪食個晏至去接仔都得。

諗番舊年，朋友個仔統一派位派到去山旮旯，朋友兩公婆叩門寫信出盡法寶，幾經辛苦先至將個仔送番去市區，聞者心酸聽者流淚，如此個案，正係越洋過海投奔西方的催化劑。

之不過，亦有朋友對呢個遊戲樂此不疲，面書上時有日走四場參觀名校一啖砂糖一啖乜的 post ，又有父母係名校舊生曬同校長拍膊頭合照。如果我唔走，我都可能要走一轉薄扶林，去番自己間小學，「麻煩你幫我 check check ，我 N 年前畢業，我個仔係咪有分加？」真心笑唔出。

原先有諗過不如等個仔讀完小學至走，不過身邊過來人都話，細路仔易適應……

究竟，細路仔易適應，定係大人易適應呢？待續......

作者：三個A，2017年，一家三口選擇移民慶回歸。十五個鐘飛機、八個鐘頭車，終於到達俄亥俄州當中一個小鎮，大人細路，齊齊 Life Reboot。之不過，原來美國……

探索驚奇精彩的 wONdEr 故事，請LIKE 我們的Facebook Page，並設定為「搶先看」：
https://www.facebook.com/wondermedia.hk/