中國快將成為全球第二大經濟體，當中珠三角作為全國主要經濟火車頭之一，兼世界工廠重要基地，貢獻不容忽視。噚日政務司司長唐英年(圖)用咗個好生動嘅比喻，反映珠三角喺全球經濟地位。

佢話市場有個講法，若港深廣高速公路塞車15分鐘，會阻礙物流，全球嘅電腦價格會好波動。聽落好似誇張咗啲，但唔多唔少反映出珠三角喺全球經濟產業鏈嘅位置。
珠三角經濟充滿活力，雖然面對去年嘅環球金融危機，但廣東省副省長萬慶良話，09年廣東省仍保持9.5%嘅經濟增長，出口更急升29.9%至358億美元。智經研究中心噚日就舉辦咗個「世界級珠三角都會」高峯會，邀請各方智者，為港澳同珠三角打造成「世界級珠三角都會」出謀獻計。
萬省長就希望深化粵港兩地嘅城市規劃合作，為共同發展定位，爭取將兩地大型項目納入國家「十二．五」規劃之中咁話。