終於到了最後一次快活谷夜賽，用A跑道作賽，由於內欄養草已久，而A跑道內欄前置優勢極大，睇牌面摩、方、蔡佈下重兵，相信賽果傾向正路機會極大，別太刻意求冷。
方嘉柏返回谷草主場，佈下強陣，當中重心推介第四場「薑餅人」。
「薑餅人」近幾仗一係跑沙田，一係玩留後，一係外疊遊馬河，此等賽績絕對可當無跑過。今戰部署非常明刀明槍，減夠分後重戴贏馬配備之眼罩，埋門拍跳考驗有番勢頭，再加埋黃金1檔，結合同場快馬僅得12檔「皇子」，只要「薑餅人」肯搶前，可憑本身輕磅之利贏馬！
另外推介兩駒，第一場「野外桃源」前次因放得急力併僅敗，剛戰遇到超快步速，縱使稍留但本身不是鬥後勁之馬，跑第三雖敗不辱，今場快馬偏少，預計跟前會賺步速，結合對手實力普通，近期五班賽經常開大熱Q，足証優劣分明，所以今季能於四班上名之「野外桃源」實在太有利了。
第三場「大收成」上場起步慢，但末段能撲近「醉中意」，初跑谷草表現算十分出色，總時間又快過同日三班頭馬「星運俊爵」，今仗只要起步順利，以段速計「花紅」絕非其對手。