李八方online︱安老院接連爆疫失守 社署署長放假個半月
蘋果日報 2020/12/16 22:50
李八方online武漢肺炎
據悉，梁松泰下周一（21日）冬至日開始放大假至明年1月30日。資料圖片
武漢肺炎第四波疫情來襲，政府強制要求安老及殘病院舍員工接受病毒檢測，被批評安排混亂，就連社聯都鬧爆配套不足，輪候時間長，增加感染風險。但政府一於少理，仲計劃收緊至每7日強制檢測一次。正當業界憂慮疫情蔓延、人手不足，社署署長梁松泰就揀啱時間「避疫」，下周一起放大假差不多一個半月。
據八方所知，梁松泰下周一（21日）冬至日開始放大假至明年1月30日，其間就由副署長（服務）林嘉泰暫代署長一職。武肺疫情未見緩和，亦接連有安老院院友和職員中招，但身為社署署長嘅梁松泰突然喺呢個時間放大假，仲要連續放足差不多一個半用，即引起唔少官場中人議論紛紛，有人擔心梁署長健康出問題，亦有人估佢係離職前休假，戥佢高興咁話。
社總會長倫智偉同八方講，早前社總已去信社署署長，就強制院舍社工做檢測事宜要求同署方會面，一直冇回覆，昨日又再去信，諗住署方會有安排，點知梁松泰喺呢個時間突然放個半月大假，感到失望。倫智偉話，嚟緊會展開第二輪強制院舍員工檢測，遲啲仲話要做到每7日一檢，業界都有好大反響，促請署方盡快安排會面，聆聽業界聲音。
八方聽聞，今次梁松泰只不過係清假，唔好諗太多，亦相信佢會喺社署做到退休。社署回覆就話，署長係正常休假，署方已按一貫機制作出署任安排。之不過咁，政治一日都嫌長，何況係個半月，到時係乜光景都冇人知，又有誰會估到，2020年嘅香港，會係今天嘅景象。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！