初哥最啱玩雷射大炮模型
BANDAI喺2001年壓軸MasterGrade版模型終於面世，就係響「一年戰爭」篇中，高達得力助手「雷射大炮」！鮮紅機身，配合粗壯線條，相信各位Fans就算無睇過卡通片，都有玩過街機Game，對佢有好深印象。
文、模型製作：姚兆偉
攝影：楊錦文
零件齊容易砌
MG版模型系列最大好處，就係適合唔同年齡嘅朋友玩，尤其係初哥或者唔願上色嘅懶鬼！淨係齋砌都已經好靚仔，皆因絕大部分零件都已經係依足設定顏色做好，細微到頭上機關槍口都係獨立黃色組件，眼罩亦係透明綠色，加上大部分夾口都係收藏喺刻線之內，拼合後難以察覺，確係慳番唔少工夫，當然如果大家有心機噴上陰影色，效果更一流！
首次擺出經典動作
繼20年前出過同一比例模型後，Fans等到𠵱家至有改良版。今次係融合咗PG同MG兩個系列嘅技術，令好多以前做唔到嘅動作都可一一展現，畀大家唔少驚喜。例如卡通片中，雷射大炮最經典嘅動作莫過於爬低發射大炮，這個動作喺任何高達模型都做唔到。今趟廠方特意做多一對可摺起關節嘅手掌，使雙手可以90度角屈起！頭部除咗加大仰望關節嘅活動範圍外，頸部以下亦可向內縮起，形成雙重活動關節嘅效果，使雷射大炮雙手可以貼地趴低，頭部亦可以向前直望。
PG及MG技術共冶一爐
雷射大炮雖然同高達嘅設計一樣，肚內可以收藏一架核戰機，並變形成為駕駛艙，不過大家唔好以為係同幾年前出過嘅RX-78高達內嘅一樣，其實係廠方將PG版嘅核戰機由1比60濃縮成1比100，所有機關設計都係一模一樣，例如拉動機頭會連背翼一齊摺起，而後備機艙亦同樣露出精密嘅內藏機件，設計及製作絕不馬虎。
內藏機械多又精密
由於本身原著設定嘅限制，雷射大炮所附設嘅武器種類唔多，除咗基本嘅雷射槍之外，兩肩上嘅240毫米口徑大炮可替換為一對12發集束火箭筒，另外喺兩隻小腿外側有機關收藏咗2粒手榴彈，而兩隻腳、手腕及背囊可以拆除裝甲，見到內藏機械。
雷射大炮四面睇
銷售店舖
星輝模型（24244388）
地址：葵芳葵涌廣場2樓C156B舖
超人玩具（23662688）
地址：旺角西洋菜街1N兆萬中心2樓222號舖
宇宙船（23902708）
地址：旺角奶路臣街19號H地下