有時上網，會覺得頂唔順。再正面的事，網民總有能力發掘出負面那面，好人好事背後也充滿陰謀論。看得人精神疲勞以至麻木。

「我想咁0架？我都想開心0架！」的確，你看香港現實環境，開心到咩？

所以，如果有人同你講，要喺香港開Talk show——不是黃子華那種，而是電視節目，內容是好人好事，開心正面。好的故事，會有獎金／獎品。

睇到呢度，你不禁問：傻的嗎？

度呢條橋嗰個，係劉綽琪。

香港觀眾對劉綽琪的記憶，印象最深刻應是那個龜苓膏廣告。她已經在香港消失了十年。直至最近再出現關於她的報道，是去年喪夫。原來她的爸爸早前也離世。

劉綽琪出道不久，身世被揭。14歲那年，母親自殺身亡。

女人四十。結婚兩年的丈夫病逝，最近就連爸爸也走了。43歲的劉綽琪，又變番孑然一身，重新起步。於是她想到回港。

劉綽琪今次受訪，由08年闊別香港說起。那年她毅然返美，因為長居當地的父親身體欠安。「爹哋始終八十幾歲，佢當時要做心臟呀各樣嘢要做手術，所以想返去陪下屋企人，所以大家千祈唔好以為我唔做。」劉綽琪的確係冇退出，除了照顧父親和患癌的外籍丈夫，還闖荷李活，入埋美國演員工會，拍過美劇。

劉綽琪笑言：「咩都要做，拍過戲，但我最鍾意都係拍電視，可以一季一季咁，尤其我係睇《Friends》大，好似睇住佢哋改變、一齊成長咁，所以啲人問我：『你去荷李活發展係咪想拍電影呀？』我話唔係呀，其實我都係鍾意拍電視劇咁。跟住又拍廣告啦。」

今次返港，已無牽掛的劉綽琪說，會留耐啲，籌備talk show。「我都係香港人，香港長大，香港是我家。見到近年好唔開心，自殺率好高，我自己會覺得……我可唔可以做番啲嘢呢？」

「其實香港人仲好有愛心，同埋仲有好多人私底下做緊好多好事，但係我又唔想做到好煽情嗰隻。我係想用開心方式分享好人好事，希望大家聽完個節目之後會好開心。」鼓勵好人好事？「做得好事多，個人都會開心啲。」驟聽十分老土，但由劉綽琪講出嚟，感受又會唔同。

今次劉綽琪自己兼任主持同監製，請來Howard McCrary做theme song，暫定做一季先，睇下成績如何再決定是否添食。「Talk show喺香港一直都唔係咁蓬勃，我個人覺得，大家都好吝嗇俾budget去做。我當年做《犀牛俱樂部》嗰陣budget好大，景好靚，亦有駐場音樂師喺度。希望可以啦。依家都會同唔同電視台approach，因為我都覺得應該唔止一個電視台可以播嘅。」劉綽琪港姐出身，先後效力過無綫亞視，人脈是有的，但講到互信，就要通過考驗。

問題出在劉綽琪做埋監製。有啲人會覺得：「你掂唔掂0架？」其實劉綽琪喺美國嗰陣都做過幾個節目嘅監製嘅……

「啲人會覺得，搵你做主持，冇問題呀！但你做監製呢……佢哋（指電視台）都會想參與。有啲人好有興趣，『但我哋係咪可以做番總監製呀？』當然係佢哋做總監製啦。」

劉綽琪其中一個方案，係自己一手一腳包辦成個節目製作，然後賣俾電視台，但她還是傾向同電視台合作，確保製作資源。

將荷李活嗰套搬嚟香港得唔得呢？「呢幾年香港電視圈都幾悶下。」劉綽琪說。

好人好事門檻好高——好似係。她說不：「唔係一定要做善事，可能人哋多嘢拎，你幫手開一開門，好簡單0架咋；或者唔好入lift就顧住望個電話……好多嘢其實好少事，每人做少少少少事，已經好大。」

精選娛聞，喺晒《娛果》
http://fb.com/appledailyent