甚懂搞噱頭的亞視，前晚出動八位亞姐候選佳麗擔任免費勞工，在旺角行人專用區為節目《第一手真相》派發宣傳單張，眾佳麗派傳單期間遇上落雨，紛紛狼狽走避及用宣傳單張擋雨，但一見記者拍照，她們又馬上放下單張影相，認真識做。

八位佳麗中以21歲來自廣東省的學生黃玉華樣貌最省鏡，深受男途人歡迎，甚至上前邀她合照。黃玉華表示今次乃首度來港，問她可知自己是最受歡迎的佳麗，她說：「其實大家差唔多，出嚟宣傳預咗有人影相。」問她在旺角派傳單可覺得被亞視利用作免費勞工？她說：「呢啲舉手之勞，冇錢收唔重要，過嚟香港參觀亞視幾有意義。」
此外，有「陝西陳瑀涵」之稱的魏璐也頗受男途人歡迎，而有「廣東關心妍」之稱的戴雨秋表示自己家住深圳，故經常來港購物，對旺角一點也不陌生，問她會否擔心遭博懵，她說：「唔會，有工作人員喺度，香港市民素質好好，應該唔會做出呢啲嘢。」
採訪：卓寶花
攝影：仇志德