港股呢兩日成交雖然低，噚日大市成交金額，都係得500億多啲。不過自從耀科（143）公佈大股東易手中信國安後，細價股禾雀亂飛，炒味真係返晒嚟！要數呢兩日焦點殼股，一定有中建置地（261）份。

中建置地主席係麥浚龍老竇麥紹棠出任主席，早前公司公佈，新興鑄管擬以12億元認購中建置地新股，如果交易完成後，就會成為控股股東。呢隻股冇錯昨日再升兩成後有所回吐，最多更跌超過一成，不過收市只係跌近3%，反映獲利盤雖多，但隻股承接力仍然強勁。

強勢自有因，隻股最大嘅亮點係，今有報道指，大股東中建富通（138）已於昨晚，將手持股份全數減持，並正分批上板令新興鑄管，向成為控股股東邁進一步！

講到呢度就要考古，話說想當年麥紹棠幫中建數碼找到海爾（1169）呢個買家，當中經歷風雨後，麥紹棠一沽晒，隻股就全力起動。目前中建富通只係持有約8億元，只可收息唔可以換股嘅承兌票據，相信新興鑄管會再以現金買埋佢，到時隻嘢就真正乾淨晒。

另外，要知新興鑄管係央企旗下，深圳上市，市值達300億。不過中建置地市值只有30億，會唔會上到100億市值唔敢講，但央企得到全權控制，下一步自然諗注資，概念夠晒；隻耀科消息公佈後，都炒高兩倍，依家中建置地只係升65%，點計都未炒完。