當年今日
關於我們

【楚雲聲】第四場熱有勇冠多 冷有星日名駒(Cloudy)

蘋果日報 2018/12/18 20:21

勇冠多楚雲聲Cloudy第四場星日名駒

剛啱星期日(16日)到現在,我收到無數訊息,叫我快啲搵條水魚去六叔珠寶買婚戒。仲有賽馬台粉絲錄畀我嘅恥笑實錄,畀大家歡樂一下,詳情請留意番我面書專頁(Cloudy Kwan關楚雲),順手畀個like,多謝。
其間,有好幾位人兄叫我落力刨好啲,聽晚(19日)要準要中,仲要有分頭。我想講,我睇人睇咗咁多年都尚未嫁得出,泥地賽事少之又少,揀隻爆冷嘅泥地王者,分分鐘難揀過老公。
須知道,泥地馬十之八九都係核核突突一嚿嚿,就算我贏到錢,感覺都唔會大得去邊。正如啲大隻佬攞到幾多個健美大獎,都係唔會令我心心眼。
不過,馬照跑舞照跳,我就反其道而行,希望搵到堆其貌不揚而有機會跑得好嘅馬,我諗老公應該都係類似咁揀法。
熱有第四場「勇冠多」,今季去咗丁生度一場熱身然後三度上名,馬算壯跑幾場出力嘅都保持狀態,排第4檔起步繼續主宰步速,要番。
冷腳有「星日名駒」,擺明具有泥地性能,一路操緊教緊,泥地1200米兩仗為測試,上場有追勢復課再加操,如果今場咬緊放頭馬跑,呢匹其貌不揚馬有機會近。
empty
勇冠多(近)對上三戰冠亞季各一