年近歲晚，班分析師、經濟師頻頻曝光，就出年嘅前景，為大家指點迷津。噚日貿發局首席經濟師梁海國（圖），預告2011年嘅出口前景，不過佢好坦白，話自己都有好多局限，估唔掂。
眨吓眼，下個禮拜尾就到聖誕，華華都想知今個聖誕市道點樣，不過梁生就唔肯做任何預告，佢話美國嘅聖誕市道表現，除咗睇經濟情況，仲要睇天氣……如果唔凍，銷售會冇咁好；太凍，啲人又唔願意出街；要凍得嚟又唔係太凍，先至最啱消費喎！梁生仲話唔識估美國天氣，叫大家等吓，佢只可以做事後分析。
另貿發局調查顯示，廠家嘅出口信心指數下跌，問佢點解，佢話：「廠家信心係睇幾多單，唔係睇經濟學家講乜嘢嘅！」