電影《淪落人》的演員黃秋生、葉童、李璨琛、姬素•孔尚治（Crisel Consunji）及導演陳小娟，今晚去到北角出席慶功宴，《淪落人》於4月11日上映至6月9日，香港累積票房達1,972萬港元。

黃秋生笑言，可以找女主角同鄉入戲院捧場，票房就會過2,000萬，秋生說：「自己都估唔到有咁好成績，至於分紅有多少，暫時未知，應該都會有幾十萬，用嚟交租交電費，你知我幾窮。」早前獲意大利烏甸尼遠東電影節頒授「傑出成就金桑獎」的黃秋生表示，當時氣氛感動，他說：「成個劇院嘅人起身拍掌5分鐘，我冇喊，男兒有淚不輕彈。雖然有獎攞，但係工作冇多到，唔會加片酬，冇嘢做必要時走去做茶餐廳或者喺街邊賣熱狗。陳果導演嘅戲唔啱我拍，因為要4夫6妻，我冇本事，有心無力。」

對於昨天百萬人上街遊行「反送中」，秋生說：「噚日有出街，之前一早答應咗人去睇騷，當時未知道噚日係遊行，睇完騷去咗大坑食咖喱，見到條街好多人，之後好攰就返咗屋企休息。」

李璨琛表示，沒想過《淪落人》能上畫兩個月，他說：「太太有睇首映，佢好少睇戲，有話我嘅演出OK，期待原班人馬再合作。」葉童說：「老公唔畀面，我嘅戲佢通常都唔睇，票房我冇留意，但之前去光顧菲律賓人嘅舖頭，佢哋問我係唔係戲中演員，估唔到本地嘅菲律賓人都認得我。」

-----------------------------
【新聞有價】6月17日起 繼續撐蘋果
http://bit.ly/2IJ24ZR
--------------------------------
【記住63836568】全民爆相爆片！下一個爆料王就係你
https://bit.ly/2Guolu9