「文青女神」袁澧林、馬志威、劉俊謙、杜小喬同黃劍文今日喺銅鑼灣出席ViuTV劇集《瑪嘉烈與大衛系列：前度》首播發佈會，會上播出約10分鐘嘅精彩片段，當中有唔少Angela分別同馬志威、許志安嘅咀嘴戲，以及劉俊謙同杜小喬嘅咀嘴戲，雖然劉俊謙同廖碧兒都有咀戲，但佢話：「廖碧兒嘴唇淋淋地，好似啫喱，小喬就硬少少，不過兩個都好錫，但係最深刻係同小喬喺巴士上咀嗰幕，因為我見到佢下半身係硬晒！」

獻出螢幕初吻嘅袁澧林被馬志威笑佢食唔停：「通常拍之前就唔食嘢，我會準備漱口水、牙膏牙刷、香口膠。」袁澧林表示：「我冇諗咁多，佢有漱口水，經驗老到。」問到袁澧林一日食幾多餐﹖佢話：「少食多餐，拍嘢特別攰，拍嘢好消耗體力，要長期ready狀態。」同馬志威咀緊張啲﹖定同許志安咀緊張啲﹖袁澧林話：「馬志威，因為佢嘅場次先，我又冇經驗。」喺劇中，袁澧林飾演嘅「瑪嘉烈」一腳踏兩船，同佢現實生活中好唔同：「瑪嘉烈好畀心機去拍拖，可以談一生戀愛，一套戲可以同兩個人睇兩次，一個蛋糕整兩隻味，我就冇咁多精力。」未試過一腳兩船嘅馬志威話：「應付一個人都咁攰，點應付兩個人呀！」袁澧林大讚馬志威好仔，但就嫌對方靚仔，佢笑住話：「我啲男朋友通常都唔係好靚仔，係才華型，勤力，好有夢想。」

對於被爆出同經理人公司Starz People有合約糾紛，袁澧林話：「有啲誤會，O依家一路處理緊，好快會解決到。」有冇私下接工作﹖佢即刻話：「我唔夠膽啦當然，我同公司關係唔係咁差，都OK，呢幾個月一路都有做嘢，一直有開工，公司同事都有陪我。」即係會繼續為《前度》宣傳﹖佢話：「冇停過。」至於合約會唔會繼續落去﹖佢就表示遲啲再透露。