大市成交萎縮漸趨嚴重，昨日港股成交僅錄得350億元，創20個月以來新低。星俠日前提及的港交所（388）當然係眾矢之的，其股價上周五曾跌穿50元，最低見49.70元，之後反彈至53元；該股昨日跌0.75元，報52.25元，但目前大市成交仍未見底，港交所後市壓力沉重，維持跌至40元左右才考慮買貨。
渣打（2888）停牌，宣佈供股。另一大銀行滙控（005）一度跌至73元，創近7年新低。現時驟眼睇，好多傳統散戶愛股都跌到好殘，但家陣買唔買得過，其實真係見仁見智，因為涉及散戶自己的投資策略及心態，若然只係諗住炒幾格上落，此種市況梗係唔建議。

全球經濟疲弱，冇一隻貨幣予人強勢感覺，金價最近曾重上800美元，成為資金避難所，刺激一眾黃金股炒上，不過遭中銀出報告「劈價」的江西銅業（358），昨雖曾抽升至4.08元，但高位未能企穩，最後只能微升0.01元，收報3.86元。江銅反彈受制10日線，除非後市能突破，否則弱勢未變。
中銀份報告主要係針對江銅未來盈利下調，其中最難估計係對冲虧損，另外就係銅價跌勢未止，令存貨減值。今個月內地銅價依然不振，估計江銅短線仍要試底。
方星俠