新民黨主席葉劉噚日突然喺Facebook自爆「因急事」去咗大陸珠海,結果返港後要自我隔離14日。撞正今日《蘋果》爆料,上任逾1個月嘅國務院港澳辦主任夏寶龍,近日南下部署嚟緊立法會選舉,令唔少政界中人都議論紛紛,估計近期有指為李梓敬度身訂做黨內初選、令到容海恩反枱嘅葉劉,此行莫非係「北上尋龍」?
有建制派議員直情話,喺Facebook自稱去咗珠海嘅葉劉,「9成係扮嘢走去珠海,然後過去深圳,去完深圳之後再返珠海打卡。」呢位議員又剝花生指,葉劉突然北上,可能係唔想對住容海恩,所以藉此自我隔離兩個星期,話容海恩稍後都應該北上向中央吐苦水陳情,「咁佢哋(葉劉與容海恩)就一個月都唔使見嘞!」
八方今日喺立法會見到容海恩,佢話知道葉劉要自我隔離後都有傳訊息「問候」葉太,「我text咗佢,話葉太小心啲啊,佢話OK啦!」但就無問過葉劉究竟因乜咁緊急要北上。咁會唔會係去見夏寶龍呢?容海恩就話:「唔知啊!點猜想啫?點估啫?(葉太北上)應該係因為好緊要嘅事啦!」但佢講明唔會去探葉劉,「唔探得㗎,如果(唔係)變到我都要隔離啊!唔探得,唔探得!」
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此