人大常委兼國家領導人曾憲梓，遭受長毛等人無理欺凌，化悲憤為唱K力量，喺聯歡晚會突然加插愛國娛樂節目，高歌一曲《沒有共產黨就沒有新中國》。有曾老雄壯嘅歌聲指引，愛國陣營士氣大壯，個個摩拳擦掌，話七年以來，我愛國勢力遭受香港人、中產階級及民主派欺壓，今次胡溫出頭，由曾憲梓攝政，親自抓愛國整風運動，我愛國勢力大反擊收復失地嘅歷史性時刻到嘞！
連日來自中央嘅消息滿天飛，愛國人士聚會，紛紛指點江山，講解現時嘅大好形勢。大家都收到風，話依靠廢董呢個人去阻嚇民主派氣燄，經已係一種唔現實嘅想法。曾蔭權思想搖擺，唐唐亦唔見養得熟，現時係千載難逢良機，由傳統愛國派（八方按：亦即香港人所慣稱嘅「土共」）接掌特區政府大權，親自拍板決定重大政策！
例如，廢董七年推動愛國教育不力，曾憲梓前日唱出咗十三億人民嘅心聲，《沒有共產黨就沒有新中國》呢首歌，係咪應該在全港中小學，包括國際學校，硬性推廣，由校長教師領導學生大唱特唱，並由香港電台早午晚各播出一次，協助香港人認識愛國嘅大是大非？
愛國人士又收到風，話國家先嗰輪對台獨勢力一輪猛攻，終於成功地影響到連戰宋楚瑜嘅民望反超領先過阿扁百分之幾點，呢一招用喺香港抗擊民主派九月立法會選舉亦一樣通。中央慘遭五十萬人大遊行欺凌，已經谷到一肚氣唔出得聲，曾憲梓、鄔維庸開炮成功，愛國口水大爭論冇可能降溫，反而要加大力度、熱度，索性一次過全港大批判、大洗腦、大整肅、大清枱，實現「三二○」台灣選舉扶國民黨上台、同埋九月特區立法會選舉扶助愛國勢力反攻重奪立法陣地嘅台港大雙贏！