今日喺韓國人氣劇《鬼怪》男神孔劉來港嘅大日子，雖然今日香港因落大雨而一度發出黃色暴雨警告，但無損粉絲見Oppa嘅心，今日因為係平日，粉絲都要返學同返工，所以現場粉絲人數唔算好多，只係大約有20多個粉絲，粉絲手持手牌及花等見偶像，而排頭位嘅廖小姐及黃小姐約10點左右到，不時高呼「Welcome to Hong Kong」字句，又用韓文祝賀孔劉噚日拎咗百想視帝，兩位粉絲指由《咖啡王子》開始已經鍾意孔劉，係鐵粉一名，又表示已買飛入場睇後日嘅粉絲見面會，不過就唔會追車，想畀返啲空間偶像，被問到鍾意孔劉咩？佢哋表示因為覺得孔劉好靚仔、好型又低調。

同場又有嚟自印尼嘅粉絲等見孔劉，佢哋表示係假期出嚟見一面，唔會入場睇粉絲見面會，又表示孔劉係自己最鍾意嘅韓星，亦睇咗佢好多作品，包括《屍殺列車》、《咖啡王子》等。

另外戴住黑超、來自山東嘅張小姐以普通話受訪時表示自己坐咗好耐飛機過嚟香港：「知道佢拎咗視帝，好想親口恭喜佢。」又指自己唔係鍾意咗佢好耐，但今次係首次追星。張小姐指自己買咗千幾蚊嘅飛，特地嚟見偶像。被問到有冇去睇台灣場？張小姐話申請去台灣嘅手續有啲麻煩所以冇去。雖然依家大陸有「禁韓令」，不過張小姐就指依家喺大陸睇韓劇都唔難，但好希望孔劉能夠返大陸開騷。