傳因為失勢被要求提早退休嘅前無綫宣傳科副總監曾醒明，今日都有現身「亞洲電視數碼媒體有限公司」成立典禮。曾醒明坦言仍未簽約，今日只係嚟做義工，佢笑言﹕「今次重出江湖，主要係吳雨大哥，4月已經單聲，9月就搵我。而營運總裁區偉林亦係我以前嘅直屬上司，知我同傳媒交情，希望我再度出山幫手，佢哋都對我好好，遷就我嘅慈善工作，我亦欣然接受邀請。」

曾醒明透露預計明年1月初上班，擔任外事部總監，負責與媒體聯絡、新聞界查詢及節目宣傳，但工作細節仍未太清楚，記者笑問人工清唔清楚？佢話﹕「未清楚呀，因為未簽。(怕唔怕冇糧出？)唔怕，吳雨大哥喺度，其實大家都係為香港電視業出一分力，希望百花齊放，良性競爭，對台前幕後都係好消息。」

對於不少網民留言對亞視失信心？曾醒明話﹕「都理解，現在亞視想用全新形象見面，希望大家畀個機會，未開始就咁講唔公平，但我睇到大家都好落力，希望大家畀個機會。」

更多娛聞，喺晒《娛果》
http://fb.com/appledailyent