C朗喊走，皇馬要錢定要人？基斯坦奴朗拿度（C朗）被指難以忍受皇家馬德里球迷嘅柴台對待，以及西班牙檢察官嘅逃稅指控，有意離開西班牙球壇，消息震驚全球。雖然一直有指皇馬認為C朗年屆32歲，商業價值隨年月下降，唔介意待價而沽，只要有球隊願意支付2億歐元（約17.4億港元）就得，但據西班牙《馬卡報》報道，皇馬方面仍然有信心C朗會回心轉意，希望未來兩星期喺俄羅斯舉行嘅洲際國家盃能夠令呢位當家球星冷靜落嚟，屆時就會再有轉機。

除咗球會，《馬卡報》亦指大部份皇馬隊友既希望亦認為C朗會繼續留效，只係俾逃稅風波影響而發晦氣，仲相信佢會繼舊年11月續約5年後再次同皇馬傾續約事宜，到時可以履行之前嘅承諾──留隊留到41歲！