錢嘉樂首次執導嘅電影《黃金兄弟》搵咗一班古惑仔兄弟助陣演出，不過識睇梗係睇配角倉田保昭同周比利，兩位都係80、90年代香港電影黃金時期嘅御用奸人，而且仲非常打得。現年60歲嘅周比利85年仲贏過WKA自由搏擊世界冠軍，都咪話唔犀利。不過唔講唔知，周比利原名周建康係因為細個時，屋企人驚佢養唔大所以當佢女仔咁湊，仲改咗呢個名，希望佢可以快高長大。

周比利79年跟師傅李鵬由加拿大返港，係第一代打自由搏擊嘅拳手，同期出名拳手包括江富德、陳文義、陳錦新等，佢話：「以前我外號叫老虎仔，依家冇咗個「仔」字就咁叫老虎，遲啲要叫老老虎。。」周比利口中嘅事頭婆係太太Amy，每次由加拿大回港教拳，太太都會同行係拳館打點。講到繼承衣鉢，周比利話：「冇小朋友，唔得閒成日周圍去，周圍走。初初諗承受唔到個責任，又打拳、又拍戲，到後來想過要，但諗下搞個出嚟，不如兩公婆享受下人生周圍去下，都過咗（生小朋友）嘅時段。」

講到周師傅個真名周建康，講起嚟原來有段故，佢話：「屋企總共有7兄弟姊妹，我同對上阿哥爭咗3、4年，生到對上阿哥阿媽已經諗住唔生。有咗我都唔知，可能當自己肥，到發現嘅時候想落我，但落唔到。」醫生當時同周媽媽講，生出嚟都唔會長命，因為你落過。所以周家自小就將周比利當女仔咁養，仲改咗個名「建康」，就係希望佢可以養得大：「自己細個好冇自信心，成人被人笑。直到11歲，見到阿哥練拳，我見咁過癮要求跟埋一齊去玩，直到12歲轉變最大。」

同時周比利阿叔有位讀營養學嘅同學，糾正佢哋一家錯誤觀念話「你哋唔可以咁對佢，當佢死硬咁，佢依家發育，要俾啲有營養嘅嘢佢食。」就係咁周比利每日都俾人餵麥皮、芝士、食麪包飲鮮奶，仲強化佢做運動，佢話：「就係咁阿爸阿媽畀我跟阿哥練拳，加上發育又食得好，啲自信心返晒嚟，開始周圍再搵武館學武，因為練開個間啲衫唔靚。」喺香港一直練到16歲，之後移民加拿大就跟咗李鵬師傅。李師傅全力搞擂台競技，學咗兩個月周比利就要打擂台，對手係畀自己高大嘅外國人，講到輸贏?佢話：「贏，不過打得都好辛苦。」

採訪：馮國康、何永寧
攝錄：馮峰、Neo
攝影：陳俊強
場地：周比利拳館

精選娛聞，喺晒《娛果》
http://fb.com/appledailyent