版權？咩嚟0架？

由《我是歌手》到依家改名做《歌手》——有傳係因為禁韓令而改名，更有傳謂，湖南衛視其實冇買到版權。

究竟呢個禁韓令下嘅《歌手》係老翻定正版？係禁韓定唔係禁韓，呢兩個問題已經唔係問題，最新嘅問題係，俾大會「高度讚揚」、譽為「進口小哥哥」嘅哈薩克代表迪瑪希，竟然涉侵權。

事緣迪瑪希喺上期《歌手》比賽中，以一首烏克蘭裔歌唱家維塔斯（Vitas）成名之作《Opera 2》再贏no.1，連升三Key令唔識俄羅斯話嘅現場觀眾都激動流淚，果然不負「哈薩克國寶」之名，香港人熟悉嘅林憶蓮同佢恩師杜麗莎，排名都要靠邊站。贏咗no.1之後，迪瑪希喺噚晚嘅大陸賀年節目裡面，又唱一次。

點知，今日俄羅斯製作人兼Vitas經理人布多夫金(Sergey-Pudovkin)，喺微博替Vitas發佈「維權聲明」——— 律師信，指迪瑪希已多次喺冇授權情況下改編、演唱Vitas嘅作品《Opera 2》，「已經嚴重損害了我方合法權益，我對此很痛心，希望通過法律途徑能讓此事得到合理的解決」，要求湖南衛視停止侵權行動。

不過其實真正有責任嘅，係迪瑪希同佢所屬唱片公司，事先應與Vitas經理人公司或唱片公司傾妥版權，而非「粒聲唔出予取予攜」。問題唔止咁，依家迪瑪希仲竟然，將佢翻唱嘅《Opera 2》版本擺上微博上賣，每首兩蚊人仔。

迪瑪希唔止係零成本，仲有錢賺添！

版權，咩嚟㗎？