【新增動新聞】
眾所周知名演員周潤發鍾意搭地鐵出入，所以經常畀市民「野生捕獲」，而繼發哥之後，連前財政司司長、人稱薯片叔叔嘅曾俊華，都畀我哋嘅讀者梁小姐喺周六（29日）晏晝，發現佢教完劍擊之後，街坊裝搭地鐵。

一向主打親民形象嘅曾俊華，以一身白POLO恤、運動褲同波鞋嘅裝束搭地鐵，雖然唔係平時見開咁西裝骨骨，但一見到作為佢「註冊商標」嘅鬍鬚，仍然好易認得出佢！勢估唔到嘅係，連車廂內嘅外國人都認得出佢，仲握晒手有講有笑添！

梁小姐話，自己喺晏晝大約4點半遇到薯片叔叔，仲一齊由九龍塘搭去金鐘，而路程之中就有幾個外國人好似認得佢，仲討論佢到底係邊個，最後成功認得出，仲主動握手「yo下佢」。不過，梁小姐話周圍嘅人「唔係好注意到身邊嗰嗰人就係曾俊華」，但都有香港人「集郵」同薯片叔叔自拍，同間唔中望兩眼咁。而呢位梁小姐口中嘅外國人，其實係中文大學人類學系系主任麥高登（Gordon Mathews）。

梁小姐喺金鐘站轉車去港島線之後，又撞返薯片叔叔，最後目送佢喺銅鑼灣站落車。梁小姐形容佢形象平實同份人「幾NICE」，又唔介意同乘客自拍「幾乎係有求必應」，又大讚相比喺電視見到佢，真人嘅感覺「好似親民啲」。至於曾俊華究竟去緊邊，梁小姐話原來佢係教完劍擊，而家搭地鐵準備返屋企。