資深演員劉江今日到九龍城潮語浸信會主日崇拜分享見證，大談他年少時到台灣學京劇到加入無綫前的際遇。現年73歲的他直言出生於沒有選擇的人生：「我都唔知咩叫京劇，只係知道去台灣有嘢學、有書讀、有飯食，嗰時坐船去台灣要3日3夜。當時有得離開老竇老母覺得好free，去碼頭嗰陣，好開心同老竇老母揮手，竟然嗰次係人生最後一次見到老竇。」

劉江在台灣學京劇學戲期間，於1962年跟學校到美國的費城、紐約、西雅圖及三藩市等地演出，緊接到巴拿馬、智利及烏拉圭等地作文化交流。劉江憶述當年曾遇車禍險象環生：「嗰次去睇瀑布，車程要6、7個鐘，我哋回程嗰陣已經天黑，個司機突然大叫，成架車側咗。我坐喺最後嗰排，跌到四腳朝天，當時好驚，淨係希望有力量可以捉住架車，架車就突然停低咗，大家慢慢行出車廂。」

後來劉江返回香港，報讀南國訓練班，再轉讀國泰訓練班：「當時我係成績最好嗰個，但係最終簽約係簽我同學秦祥林，我唔係想做大明星，淨係想搵份工，都明白點解會簽佢。」之後劉江輾轉加入佳視拍電視劇，但又遇着佳視突然倒閉，幸得吳宇森找他拍電影，然後又加盟麗的：「有日開工前，我同太太同埋個仔去飲茶，個人突然好似電一電咁，唔知咩事但係好唔舒服，隻腳又好漲，跟住條脷好似好漲，成個人企唔穩。」劉江抵達醫院時，已半邊身動不了，但心深不忿的他，對自己滿懷信心，最終康復起來：「嗰時知道大鑊，半邊身唔郁得，咁就一世。後來唔知點解好返，其實個醫生冇醫過我，我出院嗰日，12點就返去開工拍嘢，做電視真係幾辛苦。」

回望過去，劉江感恩尚算順利：「有艱難都有神喺身邊，唔開心嗰陣又會安慰我。」他謂雖然今年1月離開無綫，但仍然有戲癮：「不過我放低咗，以前祈禱會神令我更明白個角色，會講工作，而家有人搵我就做，我淨係唔想老人癡呆同埋唔好坐輪椅。」

採訪：盧妹
攝影：陳俊強

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新