大家知唔知道，品牌要具備邊三個特質？根據特首林鄭月娥上周三出席《東周刊》15周年午宴暨「香港經典品牌」頒獎禮致辭，咪就係「credibility（可信）、reliability（可靠）同adaptability（與時並進）」，之不過主辦活動嘅《東周》達唔達到呢三個要求，林鄭竟然話「拭目以待」，據聞唔少《東周》高層頭冒白煙，谷住道氣，但身兼全國政協常委、人稱炒何嘅老闆何柱國就「點醒」佢哋，話難得娥特「零舍關心」，《東周》同仁應該「與有榮焉」，瞓到半夜都應該識得「哈哈笑」。唔知點解八方聽起嚟，只覺話中有意？

其實周一出版嘅《東周》已經登咗一整頁的專欄，話要感謝特首「訓話」之餘，表明《東周》屹立不倒係因為有公信力同獲讀者認同及信任；同屬炒何旗下傳媒《星島日報》今日再出招，喺「架勢堂」欄目報道炒何對娥特嘅贈，指「何主席話如見阿媽倍感關愛」。原來《東周》編輯部高層聽完娥特「訓話」，覺得被揶揄，當然唔開心，但炒何同呢班高層開會時反問：「聽到特首咁講，有無特別溫暖？」，繼而指呢班高層「水平低」，指前三任特首都冇咁關心《東周》，到呢個零舍關心，應該與有榮焉，「你又唔見特首關心其他二周刊、三周刊？」

炒何嘅高見，何止咁少？據報佢續向呢班老總指，特首有好多「正經事」要做，邊得閒揶揄一本周刊？強調特首只係關懷、鼓勵佢哋，「你哋應該感到溫暖，晚上瞓覺都應該瞓得開心啲，瞓到半夜都識哈哈笑。」而「哈哈笑」呢三粒字係用紅色兼BOLD大咗......

聽主席一席話，可謂勝讀幾萬年書，據報《東周》同仁喺老細「點醒」下心懷感激，所以特別草擬小聲明感謝娥特。唔知相關「致謝」行為係咪陸續有嚟？但見今日唔少建制社團組織喺《星島》登聲明，支持港府取締香港民族黨，全國政協常委譚錦球呼籲「23條立法刻不容緩」，再加上該報【大棋盤】欄目話，「雖然林鄭對於短期內啟動二十三條立法有極大保留，但毫無疑問，二十三條立法已是提上議事日程，相信林鄭在十月十日的《施政報告》中，也不得不對此作出回應」，莫非呢啲就係炒何口中，林鄭要做嘅「正經事」？

立會補選新聞，《蘋果》一網睇晒
http://bit.ly/appledaily1125