早前連串賽事期間嘅爭議事件，馬會受到廣泛非議，賽事規管及發展執行總監夏定安近排四出收集意見，睇吓稍後點樣改善得更好。

據知馬會管理層有意喺今次檢討中，執正一向問題多多嘅競賽小組，夏定安約見包括唔同賽馬媒體嘅代表，並非只係做場公關騷。

夏定安入咗馬會五年，過去亦兼任過亞洲賽馬聯盟秘書長，屬於識馬嘅賽馬行政人員。

據近排同夏定安見面交流人士引述，嚟自澳洲嘅夏定安，同其他馬圈同鄉嘅傲慢自負態度好唔同，夏定安好有禮貌，處事更似英國嘅外交官，好用心記低大家反映嘅種種意見。

夏定安主管賽馬事務，應該一直都做咗唔少準備工夫，據知馬會牌照委員會原本決定季尾階段，又發牌俾韋紀力來港客串，不過夏定安就傾向試吓新騎師。結果馬會就搵咗麥偉利過嚟，事實麥偉利表現亦交到貨，搵騎師其實就係要肯試肯變。

早前「軍勇戰略」墮馬引發直路嚴重干擾冇打研訊燈，競賽小組做法令到好多馬迷不滿。其實馬會已經作出咗實際轉變，上次日馬「巴基之星」出閘後唔肯跑，小組做法明顯唔同晒，即刻打研訊燈，若然又係不為所動宣佈派彩作實，馬迷點會唔鼓譟？

馬會有好多方面嘅做法根深柢固，就算有心改革都唔係一時三刻搞得掂，特別係牽涉到人事結構方面，夏定安確係要啲時間處理。

阿Joe