港股大跌一日後即刻反彈，唔少散戶前日被嚇到沽晒貨，噚日後悔到想死。最揼心嘅莫過於原本揸咗中資銀行股嘅小股東，睇住噚日咁彈法，簡直係EQ大考驗。
面對單日大跌市，有人驚到要走鬼，亦有人繼續揸住等反彈，噚日見有網民話高位揸咗聯想（992），前日冇俾大跌市震走，想問問大家意見。隻股噚日收市報3.16元，升8仙。
喺「Uwants.com討論區」入面，happysss話：「我在高位$3.15買992聯想，但最近走勢有啲橫行，冇大跌，也冇大升，對我來說，真有點失望……大家覺得他的前景可以嗎？因下年會有新的電腦軟件面世，而這些軟件要用較勁的電腦硬件，到時的前景好像會有好轉。」
kwing1976長線睇好：「個業績唔好已經回調咗啲，有機會升番去3.2以上，但睇近來個巿，如果大巿一跌，有機會去番上次個升位2.7或以下。長線隻股OK，睇吓你自己想長線定短線。」
ding001則對呢隻股不存幻想：「對住佢已不敢再聯想任何東西了，一次又一次令我失望。」

市場飽和唔睇好

dixonfish就認為呢隻唔係好股，因為個人電腦市場競爭太大，而且市場似已飽和。
bigb0628終於被悶走：「我揸咗兩年幾，最終都喺3.12放棄，你揸咗幾耐？祝你好運啦！」
聯想今年6月由2.175元低位反彈，10月底最高見3.58元，可惜11月初公布中期盈利倒退52.74%，股價單日急跌近11%。
雖然，之後有幾間大行出嚟唱好，目標價仲定到4蚊樓上，但隻股仍然持續喺3.04至3.21元整固至今。圖表上，現價唔建議買入，有貨喺手嘅，可以博佢彈上3.28元。3.50元阻力甚大，短期唔易衝破，如果跌穿3.04元就走為上着。
余文