網球場上波來波往，食波餅真係周不時都會發生，有時未必得個痛字，上年就發生過一個好溫馨嘅故事。

咪睇法國球手泰桑高（Jo-Wilfried Tsonga）外型粗獷，外表有啲似已故拳王阿里，原來佢都係一名暖男。佢喺2016年初澳網對東道主球手奧馬查斯卡嘅次圈賽事，後者一次開波打中咗一位女球僮塊面，泰桑高見佢唔多妥，即刻嗌停比賽，用強而有力嘅臂彎扶住個女仔出場，隨即全場鼓掌致敬。

故事唔係就咁完結，呢位叫姬莉安娜嘅18歲女仔，原來之後有親筆寫信畀泰桑高向佢致謝，而泰桑高亦喺上月澳網賽事期間，喺佢自己社交網度公開咗呢封信，兼多謝番姬莉安娜咁有心寫信畀佢。