當年今日

掃把頭髮型師扮靚
姚樂怡碌柚葉出浴博好運

蘋果日報 2002/02/09 00:00


姚樂怡有感在蛇年黑運纏身,故她日前進行洗邋遢三部曲,包括往髮型屋幫襯保安局局長葉劉淑儀的御用髮型師,以及請阿姐替她修甲,最後姚樂怡又到美容院浸浴,用碌柚葉洗盡衰氣。
早前有周刊報道指姚樂怡在中山登台時,與一名內地男子同房,雖然姚樂怡後來發毒誓澄清,但她表示報道令她人格受損,故此樂怡日前特地去恤髮、修甲及以碌柚葉沖涼,實行將過去一年的衰氣洗盡。

替汪阿姐電髮
姚樂怡更幫襯保安局局長葉劉淑儀的御用髮型師,葉劉淑儀十年不變的髮型,原來出自坪石邨「高氏優美髮型設計」的老闆高佬之手。
高佬不僅是葉太的御用髮型師,早前他還替電視劇《考試情緣》中的汪明荃電爆炸頭,樂怡也來一試高佬的恤髮手勢。另外,姚樂怡又找了一位阿姐,替她修甲及塗甲油,而恤髮及修甲的收費,埋單合共僅一百元,效果令樂怡感到滿意。
姚樂怡笑說:「我從未試過去呢啲傳統髮型屋整頭同修甲,但幾好喎,又唔老套。」接着姚樂怡又再往尖沙嘴一間美容院,用碌柚葉浸浴,徹底掃走衰氣。

「要攞番個公道」
姚樂怡說:「我覺得自己舊年嘅成績幾好,又拍到《皆大歡喜》,點知臨尾整單衰嘢(傳與男子同房),搞到我人格受損。寫呢啲嘢嘅人真係好賤格!我已經出咗律師信,要求佢哋道歉同作合理嘅賠償,我呢次點都要攞番個公道㗎啦。」
採訪:朱芷瑩
攝影:陳志嵐
場地提供:艾卡美減肥美容高氏優美髮型設計