雖然政府突然出招加辣，不過豪宅市場繼續鬧哄哄，尤其係山頂聶歌信山道嘅豪宅Mount Nicholson，每個單位動輒億億聲，買家依舊唔手軟掃貨，證明香港地真係好多富豪。
Mount Nicholson呢個矚目豪宅由九倉（004）同南豐發展，早排推出分層單位招標，買家多數係城中名人富豪。

四太上月買4伙

其中，項目第2期11樓A室同B室，實用面積共8,855方呎，土地註冊處最新資料顯示，登記買家係有「低調殼王」之稱號嘅高振順，佢用私人名義斥資6.52億元買入兩伙，實用呎價7.36萬元。佢買得早，買入時間係政府上周五公佈加辣之前，假設畀舊有雙倍印花稅，交稅逾半億元。
高振順喺金融市場一直作風低調，被稱為「低調殼王」，近年佢不時同阿里巴巴創辦人馬雲交手，再引起市場注意，最經典當然係佢穿針引線，將文化中國（現稱阿里影業，1060）賣畀阿里巴巴，之後又將瑞東（現稱雲鋒金融，376）賣畀馬雲有份嘅雲鋒基金。
搵到錢，最穩陣當然係買磚頭喇，何況Mount Nicholson堅係山頂豪宅，賭王四太梁安琪上月亦斥資13億元，一口氣買入呢個盤4伙單位㗎。

李華華
mailto:[email protected]