馮仁昭四圍超:
李亞鵬秘密來港陪阿菲過生日
後日就係王菲嘅三十五歲牛一,大家都好關注佢嘅新歡李亞鵬會唔會同佢一齊慶祝,不過呢幾日王菲喺香港為王家衛嘅《2046》補戲,所以未必可以返北京。有傳李亞鵬大前日就已經秘密嚟咗香港會佳人,𠵱家佢住喺港島區嘅酒店。
王菲前日一早開工拍戲,到噚晚凌晨一點幾至收工,之後佢就返咗九肚山嘅香閨休息,到噚日下晝兩點,王菲又坐保母車出發到摩星嶺繼續拍戲。佢日忙夜忙,李亞鵬飛嚟香港陪佢就真係一啲都唔出奇。
自小識冧女
李亞鵬自從搭上王菲後,有唔少報道話佢一向靠女友上位,好似佢嘅舊女友周迅同瞿穎,前者係中國四大花旦之一,後者就有中國第一名模嘅稱號,𠵱家佢重同天后級嘅王菲拍拖,認真犀利。聽講佢靠細心體貼同唔怕辛苦冧掂王菲,之前就傳過李亞鵬一日傳百幾個手機短訊畀佢,淨係㩒掣都㩒到手軟喇!
李亞鵬喺自己嘅網站度,亦有親述佢喺讀書時候嘅初戀,佢話當年鍾意咗個女同學,有次返老家新疆過年,喺雪地上插咗幾百支蠟燭,砌成一個圖案,叫朋友幫佢影相,之後佢又問朋友借錢去廣州,將張相交畀個女同學。佢細細個就已經識得𠝹女,唔怪得佢冧得王菲咁掂啦!
亞視即還拖欠薪金
本報噚日報道話亞視拖欠《愛在有情天》眾演員馬景濤、陳秀雯、李香琴同江毅等接近一百萬元嘅爆騷錢,噚日亞視宣傳部助理總監雷國芬已經同馮仁昭講話呢筆錢今日會出番畀班藝員,重強調唔係因為報道出街先畀錢,而係爆騷嘅錢向來都係要劇集播完之後先畀,程序上向來都係咁喎。
張栢芝唔會全裸演新戲
張栢芝去咗內地拍陳凱歌套《無極》已經有好幾個月,日前有傳聞話栢芝會喺呢部戲同真田廣之有全裸演出,不過馮仁昭噚日就問過栢芝經理人公司嘅李小姐,佢話:「栢芝喺部戲度只會有一個露背鏡頭,絕對唔會有全裸演出,公司對栢芝嘅形象好緊張,唔會輕易畀佢全裸演出,等栢芝拍埋呢部戲,公司會應佢要求,畀佢放假,因為佢都好耐冇休息啦!」
無綫唔敢Cut賽事
無綫早排播映紐卡素對傑志足球賽事時,因為刪減加時十二碼嘅片段而接獲多宗投訴,所以無綫今次吸取咗經驗,已決定喺今個星期日播放阿仙奴對曼聯嘅賽事會足料播放,其他節目都會統統讓路。無綫有關方面亦已經向廣管局提出申請,而晚間新聞將會順延至晚上十二時十分至播出,等觀眾睇得痛快啲。
蕭薔拒與林志玲比較
台灣藝人蕭薔噚日喺台灣出席「六分鐘護一生」嘅活動,對於傳媒經常將佢同台灣名模林志玲作比較,蕭薔就大發嬌嗔咁話要踢記者。問到佢覺得林志玲嘅肖像郵票點樣時,佢都好大方咁稱讚對方好靚。
《追女生,當然要膽大心細啦!》李亞鵬
資料圖片
設計對白