【隔牆有耳】
八方平時都叫大家唔好戴有色眼鏡睇人，尤其是警隊。點解唔戴得？驚跌爛囉！話說噚日下晝三點幾，有架Benz喺葵涌和宜合道跪低咗，似乎係左尾胎中釘漏氣。不過司機大佬氣定神閒，因為有警察幫手，唧高部車、搬後備胎、換胎一條龍全包。

司機大佬全程齋睇

喺巴士站等緊車嘅市民Alan見到呢幕，睇到眼都凸埋，同八方投訴：「個司機又唔係四肢唔健全，又唔係年紀零舍大喎，全程企喺度望，冇幫手，換完就各有各走。警察唔使捉賊呀？幫人換胎，咁車房唔使做啦？」
當司機遇上警察，唔係多數只會抄牌咩？嗱，呢啲咪係有色眼鏡囉。有資深交通警話，遇到類似情況，一般都係建議司機盡快搵拖車拖走，不過幫手換胎亦經常發生，有時甚至會幫市民架車嘅水箱加埋水，一切都係以安全為大原則，盡快令架車郁得番，唔好阻塞馬路嘛。
曾偉雄話過，警隊形象唔能夠單計個別人士嘅睇法。都啱嘅，惡煞毆打市民拖成個星期先做嘢、低調通緝政治人物、遊行唔封路亂截龍、搵重案組去查塗鴉同講粗口，覺得唔妥嘅都係「個別人士」之嘛。如果個個警察都一心捉賊，或者服務市民，落手落腳換胎，榮獲「2013年公務員優質服務獎勵計劃」最佳公眾形象獎銀獎，就梗係「理所當然」啦。但現實又係點，心照喇！

李八方
[email protected]

激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24