何國鉦、梁慧恩同老公林忠澤今晚現身灣仔君悅出席仁濟籌款活動，何國鉦提到佢喺Facebook大呻被電視真人騷節目擺上台，不知情下變了導師身份，佢就話：「我有睇佢哋第一集，見到有我個名，都嚇咗一跳，條片係半年前拍，嗰時都唔知係拍咩節目。」問佢係咪覺得自己俾人擺上枱？佢就話：「唔係，不過好愕然，唔係睇唔起佢哋，呢個係同專業掛鈎，應該知會一聲，唔係以為我收錢。」

林忠豪堂弟林忠澤今晚同老婆大人兼前RoadShow節目主持人梁慧恩(Viann)恩愛現身，腹大便便嘅Viann話下個月27號開刀生B。至於BB性別，Viann笑言:「全世界人都知，得我唔知，因為想等生嗰刻有驚喜。男女都冇所謂。」

Viann個子嬌小，但陀呢胎真係一啲都唔易，足足重咗70磅:「好辛苦，食乜嘔乜。生完後想極速修身。」食嘢唔吸收都重70磅，可想而知Viann真係陀得好辛苦。

生B唔易，所以點都要俾番啲獎勵自己，呢份獎品叫做「黃子華」，原來佢諗住去睇子華個棟篤笑尾場。Viann話:「我冒住生命危險去睇，因為嗰陣時未坐完月，但我好想睇，不過都驚自己睇到爆肚。」Viann笑言自己係子華忠實fans，由佢第一個騷已經追緊，故希望子華可以可憐我，俾佢坐近啲醫護人員身邊，方便照應呀嘛!