日本女神深田恭子喺藝能界都算紅足18年，今年7月一口氣推出兩本寫真集《AKUA》同《This is Me》都銷量理想，佢將於下月2日再有全新寫真集《Reflection》發行，一年內出三本寫真集，深田恭子擺明要做當今寫真集女王。

今日，深田恭子就同變裝藝人Matsko出席彩票廣告嘅記者會，33歲嘅深田恭子晒腿現身，表現得容光煥發，而有關係同30歲龜梨和也嘅緋聞近日再度炒熱，唔通女神真係蜜運中？恭子同龜梨年前被撮合成螢幕情侶，先喺電影《JOKER GAME》中有激情咀戲，之後合作劇集《Second Love》更有大量情慾場面，當時恭子同龜梨被指於劇組嘅私人休息室幽會，又被拍得收工相約食宵夜，令姊弟戀一度成為熱話。

不過隨住《Second Love》播完，「龜恭戀」看似冇乜進展，但最近就有多間傳媒報道二人仍有交往，而且大家都係愛狗之人，令二人感情因撚狗而再進一步，今年恭子就被多次目擊者於代官山一帶放狗，不過恭子並唔係放自己隻迷你貴婦狗，而係帶住男友嘅兩隻狗狗Jerry同埋蘭散步，仲傳到二人已到適婚年齡隨時閃婚咁話。