當年今日
關於我們

【抽,唔好亂抽】司徒夾帶去年話唔記得港足依家呼籲毋忘?

蘋果日報 2015/12/02 06:00

蘋果打假波即時司徒夾帶

「今次真係請到香港勁揪葉鴻輝演出。
一睇佢以為好cool,其實笑起上嚟好得意,態度仲超nice。
中港大戰熱鬧過後,希望大家仲久唔久記得佢搏命守住香港。
葉鴻輝HFYAPP」——司徒夾帶2015年12月2日喺fb寫道。

嘩,原來係司徒夾帶邀請英雄輝拍嘢,今次肯肯定唔係網絡挑機,而係嗌香港勁揪啦當然!

不過,網民嘅記憶力,亦都好強,有人就記得,今日為港隊加油、大讚英雄輝得搏命守住香港嘅司徒夾帶,曾於2014年1月6號,喺fb都出過一個post,寫道:「唔係有單打假波新聞,我都唔記得香港仲有足球行業。」

司徒夾帶所謂「打假波」,係指2013年底、屯門對橫濱FC賽事中爆出打假波疑雲(新聞連結: http://bit.ly/1Nq2Pnz );而2014年1月5號,愉園與晨曦作賽後,再爆出打假波傳聞,之後廉署高調帶走7名愉園職球員,全隊包括球員、教練,至少19人被帶走助查。(新聞連結: http://bit.ly/1O37tEu )

司徒夾帶當時就喺fb寫道:「唔係有單打假波新聞,我都唔記得香港仲有足球行業。」(連結: http://on.fb.me/21uBerF )

當時網民意見不一,有人心痛香港足球名聲蒙污,亦有人留言謂:「香港足球搞成咁,因為兩類人。第一就係完全唔睇唔關心本地波嘅香港球迷;第二就係師父你呢啲淨係識抽水而一啲都唔關心本地足球嘅人。對你好失望。」、「唔係有單打假波新聞,我都唔記得你最近仲拍咗好多足球片上YouTube,果然時間好配合喎。」、「香港足球近年已復甦緊,近年本地球圈有唔少好事,例如亞冠資格,U16殺入亞洲盃決賽周,港隊排名進步緊等等,又唔見你講下?可惜今次出事都係因為大陸資金贊助商管理球隊事務,真心支持本地足運發展嘅就唔會因為個別例子而唔支持。事實上本地好多球隊近年已經好努力進步,但冇睇開本地波嘅唔緊要,但係咪要踩多幾腳嚟抽水?準備dislike。」

嗰陣司徒夾帶都有回應,寫道:「唔記得我,唔緊要,因為我唔會將你地嘅唔記得,就任意演繹為唔尊重。我嘅唔得,就係唔記得,可能只係我記性唔好呢~」、「有人勸我delete個post,傻啦,我點會抹殺大家嘅用心留言呢?你地隨便講,放心講。」

是否抽水,司徒夾帶自己明白。一年唔夠,司徒夾帶已經由「唔記得香港仲有足球行業」,突變成今日力讚英雄輝守住香港,180度轉變。識得睇,梗係睇留言:

「唔係有英雄輝,我都唔記得原來有司徒夾帶li個人。」
「侮辱香港足球,之後有水抽又浦頭,對住阿叻又唔見你咁醒?」
「唔該你,唔好有水抽先搶住出嚟抽」
「好多香港足球嘅支持者都會好記得當日你侮辱過香港足球,唔係你抽過香港足球水,我諗冇乜人知道你係個見風駛利嘅YouTuber。」
「之前又話香港足球廢,依家又要黐埋去。抽水就走開啦,你呢啲唔係真心球迷,要多個都廢事。」

完。