岑麗香同楊潮凱今日喺旺角出席「無煙社區計劃頒獎禮」，楊潮凱近日榮升爸爸，囡囡出生七磅幾屬重磅B女，潮凱笑言自己出世係極重大B，重8磅幾，問到BB出世有冇感動到喊？佢話：「我都以為自己會喊，但係冇，太太本來都冇喊，但係第二日抱住BB就感動到喊，我都有問自己係咪冷血，不過又冇理由用演技去谷眼淚㗎嘛。」佢仲話原本諗住陪太太入產房，但係因為太太陣痛咗10個鐘，最後要開刀，佢就趁太太開刀時出去食飯，之後再返醫院等BB，o依家母女已經出院返咗屋企休息。

原來香香同楊潮凱一家住得好近，香香話最初見網上有人恭喜楊潮凱，佢話：「當時以為BB已經出世，仲即刻打電話畀佢睇吓有咩要幫忙，使唔使幫佢哋買餸或者食物，點知原來未出世。」問香香會唔會去佢屋企學吓點做媽媽？香香話：「等佢哋安頓好先再去探BB，到時學下嘢。」咁想唔想好似佢咁生番個重磅BB？香香就笑話：「到時先至算啦，順其自然，最緊要係BB健康。」

精選娛聞，喺晒《娛果》
http://fb.com/appledailyent