亞視今次真係百廢待興，三月先至返工嘅吳雨自言都「好頭痛」、「逐樣逐樣慢慢執」。今日亞視新管理層請傳媒入大埔總台參觀，重點係陳志雲版本嘅《百萬富翁》，新CEO吳雨同新主持陳志雲今日都有現身。

試玩完畢，吳雨受訪期間，問番佢今次《百萬富翁》佈景花幾錢？他稱：「貴啦，我哋買埋版權，買埋佈景，真係過千萬，因為依足晒外國規矩，之前《百萬富翁》都係咁，真係好嚴謹，唔能夠立亂用，音樂、顏色照足晒format去做。」

吳雨稱：「我哋起嗰時到依家，都有人監察住。呢個廠比以前廣播道更大，更有氣勢，更先進更加靚。玩法有少少唔同，我哋多咗樣叫直播，同現場觀眾interactive，因為依家科技唔同咗，可以用手機直接玩，以前就唔得啦，要打電話問，依家唔需要，你喺出邊食緊飯行緊街搭緊車，只要我哋現場出緊《百萬富翁》，你開咗手機，即刻可以自己答。」

啱吖，依家仲邊有觀眾坐定定喺屋企睇電視0架？吳雨表示：「我哋有條直播台，當出緊《百萬富翁》時，喺外邊嘅家庭觀眾㩒我哋手機app可以睇到《百萬富翁》同步玩，冇獎金但有獎品，因為法例唔得。」

吳雨話手機玩同現場玩係唔同，家庭觀眾只有10秒俾佢答，除咗答啱之外，亦要計時間。如果遇到同分，大家答中都係咁多分，咁就以邊個答中時間為勝出。問到獎品係乜，吳雨話：「獎品成幾百萬0架。我哋有好多禮物送。依家科技唔同咗啦嘛，以前你睇電視要返屋企，一出題目，你即刻答，每答中一題，有一分，睇下佢今晚出咗幾多條。」最高分先有獎品？吳雨就話每周最高分嗰個就有獎品，而到第65集累積最高分者就有大獎，佢強調係獎品，唔係獎金：「以前觀眾淨係睇，依家全城可以玩，亦都可以試下自己得唔得，幾過癮吖。」

更多娛聞，喺晒《娛果》
http://fb.com/appledailyent