今朝早（5日）嘅晨課唔多練馬師出現，據了解大多出晒外國，為馬主搜羅新馬。不過，今朝依然有練馬師亮相晨課，親自監督旗下戰馬操練。

留守大本營嘅練馬師，除剛報道過嘅沈集成及葉楚航外，呢朝有出現沙田馬場嘅仲有李易達，其後更被《蘋果》影到佢同騎師田泰安有交流。

翻查排位表，佢哋於周三（7日）晚原來只喺第三場四班2200米合作「其樂無窮」，上仗爆冷贏馬嘅拍檔正係田泰安，仲要相隔兩年後取得，難怪今仗帥權仲係安仔手上。

即使呢個馬房嘅連捷馬數目唔多，但「其樂無窮」四次排3檔或以內跑同程未甩過前四名，今仗幸運地排1檔，加上今朝騎師有傾計，要再贏機會唔係冇。