今季柏寶要到11月先返港上陣,嫡系馬不少落入韋達手。好似周日第七場三班1000米直路賽賀賢隻「喜寶駒」,自從上月下旬由韋達過檔後,大細閘都親試做好晒,今仗出埋王牌與上季初出即勝一樣。
「喜寶駒」上周一由韋達彈草閘,拍住快馬「鄉村活力」,末段造22秒1;跟手相隔四日親自試泥地大閘,在前快後勁下,扣住都彈離贏,五日之內兩課閘,期間又冇過,冇番咁上下狀態及體力點會頂得住咁辣操練。今季轉四歲冇晒稚嫩種感覺,試閘亦冇好似上季般慢閘,一個暑期進步相當大。「喜寶駒」現時74分肯定未摸頂,今季起碼三W在手。韋達識貨霸住操,柏寶未返港前,梗係贏得盡贏。
詳盡內容可留意明日蘋果日報或蘋果馬網 http://hk.racing.nextmedia.com/