「𡃁模」曾經是少女模特兒的光環，造就Angelababy與Janice Man上位後轉型，如今這個名詞卻氾濫成災，與低俗掛鈎。
𡃁模出身的周秀娜同樣洞悉先機，六年間成功進化為演員兼老闆的女強人角色，從實際數字去看，下月30歲的她亦脫離「𡃁」界。怕做中女？周秀娜豪言：「係最真實嘅我！」言談至身材都火辣不變，惟獨內心添了一絲柔弱，「弱到希望有人安排好晒所有嘢，有個咁嘅男朋友。」

統籌：林妙萍
造型、撰文：林嘉慈
攝影：周樂恆
化妝：Circle Cheung of ND&Co.Co
髮型：Kel Fung of HH hair.nail

轉型是每個成功藝人的必經階段，2009年的周秀娜是性感𡃁模指標，憑惹火寫真及話題性攬枕，造成當年的「周秀娜現象」，現在的周秀娜是演員、內衣品牌老闆兼自家經理人公司合夥人，下月還踏入30歲，名正言順搣甩「𡃁」字，「其實我唔驚去迎接3字頭，大家都提醒我，但你問我都幾享受，未去到好緊張。我深信心態或者生活上，甚至對事物，心境會冀求再開啲，眼界可以闊啲開啲。」中女稱號即將聲聲入耳，她卻毫不在意，「擺乜標籤，對女仔嚟講都係自己點樣睇自己，事實上係講緊個年紀，我覺得冇必要去介意，因為呢個係最真實嘅我，個個都會經歷咁嘅階段。」30歲大計？「似乎大家都好想我拍拖。」

期待細心好男友

單身兩年，周秀娜笑說現時感情歸零，處於起點位置，縱使各地都有追求者，惜地域阻礙進一步發展，「真心要做到男女朋友，或者要追，係好需要耐性，好需要有真實嘅相處，可能只係透過網絡、訊息，我未真實感受得到囉。鍾唔鍾意嗰個人係要面對面，好似拍戲咁，睇完個劇本，喺角色入面，但去到現場邊個同你做對手戲，個交流好重要，真係要兩個人落場去溝通。」一半時間留港，一半時間駐內地拍戲，剛拍完內地劇《明星時代》，又即將赴北京開拍新戲，忙到難以分身拍拖，「𠵱家呢個階段幾開心，單身自由度都幾高，唔想純粹為咗自己單身，或者想拍拖就去拍拖，因為會增加好多不同嘅煩惱或者壓力，因為基本上畀唔到時間另外嗰個人。」
周秀娜是一個聰明的女仔，由平日應對媒體的牙尖嘴利及高轉數，對自己及團隊要求高，揀衫、化妝髮型、擺甫士都有主見，心底卻是截然不同的柔弱小女人，「喺生活上嗰個弱係，我真係喺工作嘅時候會知道想點做，淨係諗做嘢，但如果你問我，我會好想喺生活上搵個生活意識好強嘅人，唔使做嘢嘅時候就乜都唔使諗，弱到希望有人安排好晒所有嘢，有個咁嘅男朋友。」說穿了，30歲的女人就是渴望戀愛，「要好細心嘅人，我哋基本上唔需要講太多嘢，唔需要太多言語去講我哋之間嘅感覺，佢已經知道你想點。」直認期待另一半出現，「齋諗已經覺得好幸福咁。」但不敢強求，「唔想咁老土講，但真係隨緣啦，遇得上呢個人，你覺得係就係。」

敢拍《雛妓》求突破

前年一口氣衝了十部作品，在內地工作也捱得過惡劣天氣，去年產量卻銳減過半，今年繼續放慢腳步，不是因怕辛苦，而是追求慢工出細貨，「有幾個劇本睇緊，之前係因為特登去減少戲叠戲，或者同時拍幾部戲，覺得如果專注喺角色上，要投放好多精神，擺好多時間落去，一心一意做好個角色，喺𠵱家呢個階段對我會好啲。」演過強硬女友、美艷獸醫、性感打女，一直尋求突破，話題之作《雛妓》又敢不敢演？「如果有個咁好嘅機會，咁好嘅劇本，我會想去做，永遠以超越自己作為突破嘅目標。」

打扮愛閃耀

性感是周秀娜的標記，私下穿衣大不同，男仔頭、韓系才是她杯茶，簡單衣着全靠閃令令飾物點睛，「喺着衫方面嘅花心係在於飾物，飾物可以襯好多唔同嘅嘢，襯bling bling嘢喺揀衫方面要簡單啲，細節少啲。戴飾物，身上有個突出嘅位就已經夠，睇你想注重邊個焦點。」

買樓嫌太貴

內地成為港星財富快速增值的搖籃，周秀娜北上拍戲反而不計較收入，着眼點放在發展方向，「只係講求錢嘅話，喺過程入面太着緊，會畀太大壓力自己。」搵錢上樓是大部份港人目標，相反周秀娜放鬆心態，「以前覺得一定要有一層屬於自己嘅地方，𠵱家可能因為周圍飛，同哥哥夾份，買到畀屋企人，佢哋住得開心舒服就得。」吸金力不弱的她難免慨嘆一句，「香港樓價好貴，點計都覺得好大壓力。」

更多精采時尚內容，盡在 http://add.appledaily.com。