甚麼是死心？

就係當一眾亞視員工，冇糧出，就連員工福利——400元超市禮券，返到公司，竟然話派晒。

所以，即使有號稱1000萬現金擺出嚟，又如何？都冇講幾時出糧。

苦主吳先生，製作部員工，日前特登返亞視攞百佳禮券，點知上到去話冇喎，「問我上司佢又話攞咗，但我又冇喎，x你老x，依家即係恰我啲小職員呀？話要報名上去，我點知要報名上去？」亞視總台喺大埔，車費時間都蝕埋。

當時仍是亞視員工嘅吳先生，已下定決心啟動僱傭條例10A，自動遣散。今日吳先生返亞視——德勤約咗佢收信，先拎副本去勞工署申請破欠，正本之後再寄。亞視最資深員工、工作逾半世紀的程啟光，剛亦已經收咗信。

亞視出身嘅吳先生，已經係第三次返亞視。95年入職到依家，由林伯林百欣到王征，吳生一早都話死心，「我真係死心，百佳禮券都冇。」又懷念林百欣的好。今日佢離開公司時，拎住封解僱信，大方受訪:「勞工署話拎呢封信上去會簡化好多，可以即刻喺破欠基金度申請撥款。」

吳先生表示，佢今朝都收到司榮彬致員工短訊，司總叫員工「千萬別收德勤解僱信，靜候司總的好消息。」但吳先生話:「我對亞視真係已經死心，點解有錢你都唔出糧先？如果你只出三月份糧，咁對一二月未出糧而走咗嘅員工唔公平。就算再請我，我都唔會返嚟，因為呢間公司已經冇晒錢。」據知吳先生就係嗰120個「有幸」獲欽點於解僱後重新聘用之員工。