由韓國女神全智賢同「長腿Oppa」李敏鎬主演嘅SBS新劇《藍海傳說》將於下周三首播，劇集由籌備到開拍都成為亞洲各地嘅大新聞，由於此劇係全智賢產後復出之作，加上亦都有機會係李敏鎬入伍前最後嘅作品，所以萬眾期待，更被睇好今年標尾會之作，有望挑戰《太陽的後裔》嘅神劇寶座。

事實上當《藍海》落實由全智賢和李敏鎬主演後，亞洲各地都掀起搶購熱，更有傳大陸有人開價50萬美金(約389萬港元)一集購買播映權，20集嘅話即穩袋7,780萬港元，不過0依家大陸實施「限韓令」，《藍海》最終能唔能夠通過審批喺大陸播放都係未知之數，而台灣方面《藍海》就獲台灣愛奇藝購得版權，會係播出後第二日早上10時跟播，至於香港方面，myTV Super搶贏版權並會喺韓國播出後8小時後先有得睇。

據知今次呢場《藍海》爭奪戰都有唔少暗湧，雖然myTV Super早於幾個月前已有傳媒報道佢哋成功購買《藍海》版權，但直到今個星期佢哋先喺網上有宣傳片，可見中間一度未落實，所以先未有狂做宣傳。而喺台灣嘅播映權單集叫價達5萬美金(約39萬港元)，業界人士指由於索價太高而令唔少平台唔敢隨便購買，而據聞myTV Super就以3萬美金(約23萬港元)一集購得版權，即20集就要斥資約467萬港元。

現時香港播放韓劇嘅平台數嚟數去都係個幾間，港人暫時都算有福，唔怕韓劇市場被壟斷，始終有Viu呢個平台提供免費韓劇，不過如果競爭越嚟越激烈嘅話，Viu未必能夠以一敵眾購得版權。現時除咗TVB旗下平台外，Viu同ViuTV都有播韓劇，當中Viu就非常積極，一直都主攻韓劇市場，先後購買多齣人氣韓劇，亦做到喺韓國播出街後4小時內有得免費睇，至於有線都有購入韓劇，但購入嘅唔算係人氣作品。至於新加入對手就有樂視，佢之前成功搶得韓版《步步驚心》嘅版權，仲喺香港狂做宣傳造勢，之後亦購入宋智孝嘅《老婆這週要出牆》同埋徐亥振新劇《浪漫醫生金實福》，成為本港爭播韓劇嘅後起之秀，不過除咗Viu同Viu TV係免費睇之外，其他平台都要比錢睇，即係TVB嘅翡翠台、J2等屬免費台，但佢哋就唔會同步播最新嘅韓劇，會等其他收費台播完之後先會再播出。

對於香港韓劇市場競爭激烈，如何能從中取勝，Viu方面：「我哋經營now tv已十多年，所以我哋嘅團隊都具豐富購買電視節目嘅經驗。憑住佢哋敏銳嘅市場觸覺同埋我哋不斷對觀眾喜好嘅硏調，我哋有信心繼續為消費者提供佢哋喜愛嘅娛樂節目。而且我哋備有一個團隊全天候工作為許多最新嘅韓劇同綜藝節目喺首播後數小時內提供本地語言版本。Viu OTT可於跨平台同步使用，完全免費，消費者可隨時隨地下載節目、串流觀看。」

今年Viu購入神劇《太陽的後裔》響晒朵，更令Viu成為港人煲韓劇首選，不過因為Viu嘅成功，令到其他平台都想搶呢塊肥肉，對於會否覺得TVB近日亦開始加緊攻佔韓劇市場？Viu就話：「我哋相信Viu OTT無論喺服務、節目內容及收費都極具競爭力，這足證我哋Viu移動視頻平台嘅水平可謂傲視同儕。請恕我哋唔方便對競爭對手TVB置評。」

另外，樂視方面，對於今年會否會增加預算購入韓劇，樂視亞太內容事業部副總裁李志良回應時話：「每個市場都有需求同供應，每年都好幾部韓劇出爐，佢哋供應唔會變得太多，但呢兩年香港市場嘅需求同競爭對手就增加好多，好似myTV Super、有線、ViuTV等都會爭韓劇，咁個情況下價錢都起咗啲，但今季用幾多預算購買韓劇就唔方便透露。」至於點樣從中取勝時，佢就話：「採購係非常專業嘅嘢，要同CP(片商)打好關係，用唔同方法最快時間可以Lock住一部劇。(劇未拍，剩睇卡士勁都買？)有咁可能。」