前財政司司長「薯片叔」曾俊華早前被揭會加入港大做客席教授，今日商台嘅陳志雲又透露，薯片叔會喺商台主持一個節目，名叫「薯片鬚MUSIC」，英文係「Mr. Clip's Soul Music」。志雲大師仲拉埋薯片叔喺facebook直播，宣傳個新節目。曾經夾過band嘅薯片叔話想同大家分享佢年少時鍾意嘅音樂。呢次又唔知佢有冇向政府申請喇。

志雲大師話薯片叔60、70年代喺美國，當時美國有好多社運，係咪想藉此講有關社運嘢？薯片叔話唔係，佢覺得60、70年代嘅美國非常特別，同現時嘅香港有好多相當嘅地方，當時美國音樂人用嗰時嘅背景，寫咗好多有社會意義嘅音樂，希望同現今嘅人分享一下。

志雲大師即場叫薯片叔講下帶咗乜嘢嚟電台，薯片叔喺個袋拎出平板電腦，同埋一啲筆記，佢話自己寫咗好多筆記，「做開公務員嘅人習慣準備，無準備就好似冇著衫咁」。個節目未知幾時播，但唔少人都留言話好期待。

至於節目中會推介乜嘢歌？志雲大師即時叫埋陪薯片叔一齊嘅曾太出場，問會唔會推介一下當時追求曾太嘅歌，薯片叔就話，當時成日約曾太睇戲，連第一齣睇咩戲都記得，就係《Romeo and Juliet》，聽《A Time For Us》；曾太就只係記得首《LOVE STORY》，仲甜絲絲話鍾意薯片叔為人一直冇變。

薯片叔依家仲為緊搬屋煩惱，因為仲有好多嘢未執拾好，過百箱嘢，已丟咗一啲，冇太多時間處理。志雲大師最後話薯片叔應承明年同佢合作一個計劃，曾太都有可能參與埋一份。