區議殺出大量政治新星，就算未能當選，呢班傘兵得票亦唔少，好似「西區飛躍動力」三名成員都算高票落敗。其中喺發生過斬樹風波嘅大學選區，劉偉德都攞到1455票、對比起政治老手陳捷貴嘅1844票，一啲都唔輸蝕。

有人似乎對當日支持路政署斬樹嘅陳捷貴繼續冧莊，有啲不滿喎，今日喺「西環變幻時」Facebook就貼咗一張相，相中可見喺西環般咸道四棵石牆樹被斬嘅牆上，貼住寫有「Idon'tbloodyunderstandwhyyoustillvotedStephenChan」（意指「我唔明白點解你仲投陳捷貴」）嘅標語，控訴當區選民唔踢走陳捷貴，可能都係代表石牆樹訴心聲。

八方打過畀陳捷貴，想問問佢點睇呢次選舉結果？但截稿前都未獲回覆呀。陳捷貴回覆八方查詢時話，今次對手得票係意料之外，相信新增選民都投咗畀對手，又話雖則同對手近有近四百票距離，但都會從選舉結果參考民意，相信斬樹事件係關鍵，但重申從未要求斬樹，「呢次要learn嘅係公佈意見要清晰啲」。佢話選舉係民主公決，有選民都話既然有結果，「點解仲要咁講（貼標語抗議）？」

今年8月，西半山般咸道4棵石牆樹被斬，引起全城譁然，該區區議員陳捷貴亦承認在現場目撃斬樹，被市民批評無盡力護樹。