早前憑人氣劇《BB來了》人氣爆燈嘅李佳芯（Ali），最近響應環保，加入「走塑」行列參與「環保飲管計劃」，佢仲喺ig貼相，唔用膠飲管改用薯粉飲管，佢仲留言︰「出外工作有時難免要買嘢飲，要揀都一定揀可降解嘅樽裝飲品。至於飲管，今天就選擇了生物薯粉飲管，安心就是從小累積。行多一步，小成大事，唔走數，真「走塑」救海龜。」

Ali「走塑」原來緣自一隻海龜，佢話︰「之前睇過海龜，鼻插塑膠飲管嘅片段，好心痛，所以好想為大自然出一分力，今次活動覺得好有意義，只要喺生活每一個細節，作出小小改變，即可幫助大自然。」佢仲透露平時會自備手巾、餐具，減少用紙巾及即棄餐具：「我都有叫身邊嘅人支持今次活動，第一個就叫經理人支持！其實平時自己工作時，經常用飲管飲水，呢幾日好多工作人員見到我用麥莖飲管同生物薯粉飲管，都話好得意同有意義，個個都話要試。」

之前喺劇集飾演一個新手媽媽，而增添一份母愛，問佢會唔會更加關注下一代嘅未來？Ali笑言：「其實拍《BB來了》之前，我都一直有唔錯嘅環保意識，因為我真係好鍾意大自然，拍完之後，的確會想做更多事去改變生活，希望每一個『允豬』都可以同我一樣，享受到大自然為人類帶來嘅美好！」

而Ali之前拍廣告，廣告中提及幸福，問到Ali嘅終極幸福，係咪同男友拉埋天窗同結婚生仔？Ali聞言即甜絲絲話：「幸福其實可以係好平淡嘅生活。對每一日，每件細小事都心存感恩，全力去付出，得唔得到回報都好，喺每一件事上，堅守自己信念去做，咁樣對我嚟講已經係終極幸福。」

精選娛聞，喺晒《娛果》
http://fb.com/appledailyent